These-qualifications-must-for-went-to-America

అమెరికా రావాలంటే.. ఈ అర్హతలు ఉండాల్సిందే..!

వాషింగ్టన్ : వలసదారులను ఎటువంటి భేదాలు లేకుండా అనుమతిస్తామని అమెరికా ప్రకటించింది. అయితే అమెరికాకు వలస వెళ్ళాలని కోరుకునేవారికి కొన్ని అర్హతలు ఉండాలని తెలిపింది. డొనాల్డ్ ట్రంప్ నేతృత్వంలోని అమెరికా యోగ్యత ఆధారిత వలస విధానాన్ని రూపొందిస్తోంది.

ట్రంప్ అడ్మినిస్టేషన్‌లోని ఓ అత్యున్నత స్థాయి అధికారి తెలిపిన వివరాల ప్రకారం నైపుణ్యంగలవారు ప్రపంచంలోని ఏ భాగం నుంచి వచ్చినా అనుమతిస్తామని చెప్పారు. అయితే ఇందుకు కొన్ని నిబంధనలను రూపొందిస్తున్నట్లు తెలిపారు. దీనికి తుది రూపం వచ్చి, అమలైతే, భారతదేశం వంటి దేశాల నుంచి అమెరికా రావాలనుకునేవారికి ఉపయోగపడుతుందన్నారు.
 
అమెరికా జాతీయ ప్రయోజనాలకు ఉపయోగపడేవిధంగా ఇమ్మిగ్రేషన్ సిస్టమ్‌ను సంస్కరించాలని ట్రంప్ అడ్మినిస్ట్రేషన్ కోరుకుంటున్నట్లు ఆ అధికారి చెప్పారు. వ్యక్తిగత నైపుణ్యం, యోగ్యత విషయంలో వీరు సరితూగుతారన్నారు.
 
‘‘ఈ దేశాన్ని, ప్రజలను ప్రేమించేవారు, నైపుణ్యంగలవారు, ప్రతిభావంతులు, ఇంగ్లిష్ మాట్లాడేవారు, మా విలువలను, మాదైన జీవన విధానాన్ని సమర్థించడానికి కట్టుబడి ఉండేవారు, ఎక్కడి నుంచి వచ్చేవారైనప్పటికీ, అలాంటివారిని తేవాలనుకుంటున్నాం’’ అని చెప్పారు. ప్రస్తుతం అమలవుతున్న విధానాలు ఇటువంటి నిబంధనలను విస్మరించాయన్నారు.