international-services-started-from-vizag-to-singapor

విశాఖ టు బ్యాంకాక్‌.. అంతర్జాతీయ సర్వీసు ప్రారంభం

నేటి నుంచి వారానికి నాలుగు రోజులు

విశాఖపట్నం, డిసెంబరు 6(ఆంధ్రజ్యోతి): విశాఖపట్నం విమానాశ్రయం నుంచి క్రమంగా అంతర్జాతీయ విమానాల సంఖ్య పెరుగుతోంది. ఇప్పటికే దుబాయ్‌, సింగపూర్‌, మలేసియాలకు సర్వీసులు నడస్తున్నాయి. వివిధ కారణాలరీత్యా శ్రీలంకన్‌ ఎయిర్‌లైన్స్‌ అక్టోబరు 27 నుంచి కొలంబో సర్వీసును ఉపసంహరించుకొంది. అయితే తాజా గా బ్యాంకాక్‌ సర్వీసు ప్రారంభమైంది. అతి తక్కు వ ధరకు విమానాలు నడిపే థాయ్‌ ఎయిర్‌ ఏసియా విశాఖపట్నం - బ్యాంకాక్‌ మధ్య వారానికి 4 రోజులు విమానం నడపడానికి ముందుకువచ్చింది.

ప్రతి సోమ, బుధ, శుక్ర, శనివారాల్లో ఈ విమానం ఉంటుంది. బ్యాంకాక్‌లో రాత్రి ఏడు గంటలకు బయలుదేరే విమానం విశాఖలో రాత్రి 11.45 గంటలకు దిగుతుంది. ఇక్కడి నుంచి 12.15 గంటలకు బయలుదేరి తెల్లవారుజామున 4.30 గంటలకు బ్యాంకాక్‌లో ల్యాండవుతుంది. టిక్కెట్‌ ధర కూడా రానుపోను రూ.6 వేలుగా నిర్ణయించా రు. విమానం సామర్థ్యం 180 సీట్లు. తొలి విమానంలో టిక్కెట్లన్నీ అమ్ముడుపోయాయి. సంస్థకు లాభం/నష్టం లేనివిధంగా ఫిబ్రవరి వరకు టిక్కె ట్లు అమ్ముడయ్యాయని ఇండియన్‌ టూర్‌ ఆపరేటర్ల సంఘం సభ్యులు మురళీకృష్ణ తెలిపారు.

అతి తక్కువ దూరం బ్యాంకాకే

ఇప్పటివరకు ఎవరైనా విశాఖ నుంచి బ్యాంకాక్‌ వెళ్లాలంటే...హైదరాబాద్‌, చెన్నై, కోల్‌కతా నుంచి వెళుతున్నారు. ఇప్పుడు నేరుగా విశాఖ నుంచే వెళ్లిపోవచ్చు. హైదరాబాద్‌ నుంచి బ్యాంకాక్‌ 2,400 కి.మీ. దూరం. చెన్నై నుంచి 2,254 కి.మీ. దూరం. అదే విశాఖపట్నం నుంచి అయితే 1,905 కి.మీ. మాత్రమే. పైగా ఇంతకు ముందులా హైదరాబాద్‌, చెన్నై వెళ్లాల్సిన అవసరం లేదు. అంటే సమయంతో పాటు ఖర్చు కూడా కలిసి వస్తుంది. ఐదేళ్ల నుంచి చేస్తున్న ప్రయత్నాలు ఫలించాయని ఏపీ విమాన ప్రయాణికుల సంఘం ఉపాధ్యక్షులు ఓ నరేశ్‌ కుమార్‌ అన్నారు.

బ్యాంకాక్‌ నుంచి 92 దేశాలకు కనెక్టివిటీ విమానాలు ఉన్నాయని, కాంబోడియా, వియత్నాం, ఫిలిప్పీన్స్‌ తదితర దేశాలకు అక్కడి నుంచి వెళ్లవచ్చునని ఆయన వివరించారు. విశాఖపట్నం నుంచి శుక్రవారం రాత్రి బ్యాంకాక్‌ వెళ్లే విమానంలో టూర్‌ ఆపరేటర్లను తీసుకువెళుతున్నామని టూర్‌ ఆపరేటర్ల సంఘం రాష్ట్ర అధ్యక్షుడు విజయమోహన్‌ తెలిపారు. రాష్ట్రంలోని బౌద్ధ పర్యాటక ప్రాంతాల గురించి అక్కడివారికి వివరించి ఇక్కడకు తీసుకురావాలన్న ఆలోచనతో విశాఖ నుంచి 12 మంది, రాజమండ్రి నుంచి ముగ్గురు, విజయవాడ నుంచి ఐదుగురు ఆపరేటర్లను తీసుకొని వెళ్తున్నట్లు వివరించారు.